I arbeidet med å utvikle attraktive stader å bu, besøke og drive næring i må kommunar og regionar ta omsyn til grunnleggande prinsipp for berekraftig by- og tettstadutvikling. Desse prinsippa gjeld uavhengig stadens storleik, med samstundes er det viktige skilnader mellom store og små stader. Strategiar og løysingar må tilpassast lokale tilhøve.

Dilemma, gode grep og dømer

Heftet skal også bidra til lokale og regionale drøftingar om samanhengar mellom attraktivitet og berekraft, og korleis mindre stader kan gjere gode grep for å lukkast med ei framtidsretta tettstadutvikling og styrkt attraksjonskraft.

I heftet vert fleire problemstillingar drøfta, og det vert presentert gode grep for korleis ein kan møte desse. Kvar problemstilling er supplert med eit døme frå sin småby eller stad som har arbeidd med tilsvarande utfordringar. Følgande ti dilemma vert belyst i heftet:

• Ein rurban identitet
• Einebustaden dominerer
• Spreidde sentrumsområde
• Sentrum utan liv
• Parkering dominerer
• Vanskeleg å bli kvitt bilen
• Introverte småbyar
• Den globale småbyen
• Manglande ressursar og kompetanse
• Vanskeleg å gå frå visjon til realisering

Bakgrunn for heftet

Attraktiv og berekraftig by- og tettstadutvikling har vore eit aktuelt tema dei siste åra. Statlege satsingar som Fremtidens byer har bidrege til styrkt kunnskap og erfaring. Fokuset har til no vore på storbyen, med storbyens kontekst som utgangspunkt for drøftingar.

«Attraktive og berekraftige bumiljø i småbyar» er ei oppsummering av førebudde notat og drøftingar med inviterte fagmiljø under eit arbeidsseminar, hausten 2015. Gehl architects har gitt innspel til arbeidsseminaret og står for den faglege samanstillinga av heftet. Distriktssenteret har bidrege med tekstar og døme henta frå eit utval mindre stader, som illustrerer utfordringane som heftet drøftar.