Eit av kjenneteikna ved utviklingsarbeidet i Austevoll, er den tette koplinga mellom prosjektleiar, rådmann og ordførar. Dette gjev arbeidet ei god forankring i kommunen, og har bidrege til å styrke samspelet med lokalsamfunn og innbyggjarar og med andre utviklingsprosessar.

Prosjektleiar har samstundes god kontakt med dei lokale arbeidsgruppene og ein finger med i spelet på mange tiltak og arrangement. Dette er krevjande, men utvilsamt ei styrke for engasjementet og framdrifta i dei lokale aktivitetane.

Utviklingsarbeidet rettar seg særleg mot ulike tilflyttargrupper og mot born og ungdom. Dei ulike målgruppene har vore godt involverte i planlegging og gjennomføring. Initiativ og tiltak har vakse fram nedanfrå – særleg hjå bygdelag og engasjerte eldsjeler på øya Møkster. Dette har gitt eit sterkt lokalt eigarskap til arbeidet.

Det har skjedd mykje positivt i Austevoll dei siste åra. Kommunen er i vekst og opplever blest om dei mange utviklingsprosessane som går føre seg. Dette er igjen med på å gje ny energi, og er soleis ein forklaringsfaktor for resultata og framdrifta i utviklingsarbeidet.

Samstundes peikar prosjektleiar på betydninga av nasjonale og regionale satsingar: Deltaking i regionale og nasjonale programsatsingar har gitt det lokale arbeidet tilgang til kompetanse, nettverk og ressursar – noko som blir rekna som ein viktig føresetnad for resultata som er oppnådde.

Gode resultat og sterk framdrift har også med evne til å ta ut læringa i konkret handling å gjere. Det sterke fokuset på gjennomføring synast å vere eit kjenneteikn ved både kommuneorganisasjon og lokalsamfunn i Austevoll. Dette vert understreka også i analysa «Sukessrike distriktskommunar«, der Austevoll er ein av casekommunane.

Sidan 2009 har Austevoll kommune støtta aktivt opp under og hatt ei sentral rolle i å koordinere lokalt utviklingsarbeid og samfunnsutviklingsprosessar. Den kommunalt tilsette prosjektleiaren har ei koordineringsrolle for dei lokale arbeidsgruppene, fungerer som rådgjevar for lokale eldsjeler og er aktiv i å skape lokale nettverk og arbeidsgrupper.

Ein del av stillingsressursen til prosjektleiaren går også med til planarbeid, særleg arbeid knytt til nærings- og samfunnsutvikling generelt. Dette bidreg til at dei lokale utviklingsprosjekta ikkje blir hengande i lause lufta, men derimot kopla på andre utviklingsprosessar.

Prosjektleiaren i Austevoll kommune har det siste året også blitt nytta som rådgjevar inn i andre samfunnsutviklingsarbeid i Hordaland, gjennom satsinga LivOGLyst. Hordaland fylkeskommune poengterer at Austevoll, gjennom LivOGLyst-programmet, har tatt steget frå lokale planar til konkrete handlingar. Dette har gjeve handfaste resultat i og utanfor eigen kommune.

Gjennom LivOGLyst-programmet har Hordaland fylkeskommune støtta opp om arbeidet på fleire måtar. Prosjektet har delteke i nettverkssamlingar for LivOGLyst-prosjekt, fått tilbod om kurs og andre kompetansehevande tiltak, og rettleiing i konkrete spørsmål frå ei dedikert arbeidsgruppe.

Måla for arbeidet har vore å styrke inkluderinga av tilflyttarar og innvandrarar og stimulere bulyst hjå innbyggarane, særleg hjå born og ungdom. Dette har prosjektet søkt gjennom å jobbe med ei kulturbasert stads- og næringsutvikling, med fokus på sosiale møtestader og arrangement. Måla er avgrensa og realistiske.

Prosjektet har hatt god framdrift og gjennomført dei fleste planlagde tiltaka. Frå oppstarten i 2009 har arbeidet bidrege til å etablere nye arbeidsplassar, og ikkje minst møteplassar og kulturarrangement for folk i alle aldrar. Kommunen meiner prosjektet har hatt god effekt ut frå kva som var måla for arbeidet. Etablering av nye lag/organisasjonar og nye verksemder viser dette.

Følgjande resultat er nådde:

• På Storebø er det skipa ei ny verksemd og ein lågterskel møtestad: Kulturbakeriet. Her blir fleire kulturarrangement, i regi av LivOGLyst, arrangerte.

• Sommararrangementet «Havfest» på Storebø er blitt ein fast tradisjon, og trekkjer både fastbuande og mange tilreisande.

• Ei rekke arrangement for born og unge, med kopling mellom kultur og idrett er gjennomført og etablerte for seinare høve.

• Austevoll turlag er etablert og turstiar er merka opp.

• Fleire forfattarkveldar, kombinert med at forfattarane har besøkt skular og bibliotek på dagtid.

• Innkjøp av informasjonstavler som informerer om ulike arrangement i kommunen. Tavlene er plasserte i mykje besøkte bygg i kommuen, som til dømes biblioteket.

• På Møkster blei det i 2010/2011 også bygd to utleigebustader for folk som ønskjer å «prøvebu» øya. Bygdelaget Møkster Bu og Austevoll kommune har jobba mykje med å finne ein god samarbeids- og finansieringsmodell for tiltaket. Les meir om dette i prosjektskildringa «Flytt til LivOGLyst«.